ရေထိပန်းသွင် လန်းဆန်းသော ဆက်ဆံရေးဖြင့် ခေတ်သစ် စနစ်သစ် အတွက် စာမျက်နှာသစ် ဖွင့်လှစ်ခဲ့ပြီ (အယ်ဒီတာ့အာဘော်) www.mgyelatt.blogspot.com

ပြည်ထောင်စု သမ္မတ မြန်မာ နိုင်ငံတော် ဖွဲ့စည်းပုံ အခြေခံ ဥပဒေ (၂၀၀၈)အရ ပေါ်ပေါက် လာသော ပြည်ထောင်စု သမ္မတ မြန်မာ နိုင်ငံတော် အစိုးရသည် နိုင်ငံတော် ဖွဲ့စည်းပုံ အခြေခံ ဥပဒေ ပုဒ်မ ၄၁ ပြဋ္ဌာန်းချက် ဖြစ်သည့် ““နိုင်ငံတော်သည် လွတ်လပ်၍ တက်ကြွပြီး ဘက်မလိုက်သော နိုင်ငံခြားရေး ၀ါဒကို ကျင့်သုံးသည်။ ကမ္ဘာ့ ငြိမ်းချမ်းရေးနှင့် နိုင်ငံ အချင်းချင်း မိတ်ဝတ်မပျက် ပေါင်းဖက် ဆက်ဆံရေးကို ရှေးရှုသည်။

နိုင်ငံ အချင်းချင်း ငြိမ်းချမ်းစွာ အတူယှဉ်တွဲ နေထိုင်ရေး မူများကို စောင့်ထိန်းသည်”” ဟူသော မူအတိုင်း လိုက်နာ ကျင့်သုံးလျက် ရှိရာ ယနေ့ဆိုလျှင် ကမ္ဘာ့နိုင်ငံ (၁၁၁) နိုင်ငံနှင့် သံတမန် ဆက်သွယ် နိုင်ခဲ့ပြီ ဖြစ်သည်။ ဖွံ့ဖြိုးရေး မိတ်ဖက် နိုင်ငံများနှင့် ပူးပေါင်း၍ နှစ်နိုင်ငံ ဖွံ့ဖြိုးရေး ကိစ္စရပ် များနှင့် ဒေသတွင်း ဖွံ့ဖြိုးရေး လုပ်ငန်းများ ဆောင်ရွက်ရင်း ကုလ သမဂ္ဂ ထောင်စုနှစ်သစ် ရည်မှန်းချက် များကိုပါ နိုင်ငံတကာနှင့် ပူးပေါင်း ဆောင်ရွက်လျက် ရှိသည်။

ပြည်ထောင်စု သမ္မတ မြန်မာ နိုင်ငံတော် အစိုးရသည် လွန်ခဲ့သော နှစ်နှစ်တာ ကာလမှ စ၍ နိုင်ငံတော် ဖွဲ့စည်းပုံ အခြေခံ ဥပဒေနှင့် အညီ အုပ်ချုပ်မှု ပုံစံ ဖော်ဆောင်ကာ အားကောင်းသော ဒီမိုကရေစီ စနစ်နှင့် ခွန်အားရှိသော ဈေးကွက် စီးပွားရေး စနစ် ပီပြင်စွာ ဖြစ်ပေါ်လာရေး အတွက် နိုင်ငံရေးနှင့် စီးပွားရေး ပြုပြင် ပြောင်းလဲရေး တို့ ဆောင်ရွက် နိုင်ခဲ့သည်။ တစ်ပြိုင်တည်းတွင် မတူညီသော သဘော သဘာဝ ရှိသည့် ငြိမ်းချမ်းရေး လုပ်ငန်းစဉ် (၁၂)ခုကို တည်ဆောက်ရင်း ဆယ်စု နှစ်ပေါင်းများစွာ နောက် ကျ ကျန်ခဲ့သော နိုင်ငံတကာ ဆက်ဆံရေး ပုံစံသစ် တစ်ခုကို ပြန်လည် တည်ဆောက်လျက် ရှိသည်။

ပြည်ထောင်စု သမ္မတ မြန်မာ နိုင်ငံတော် နိုင်ငံတော် သမ္မတ ဦးသိန်းစိန်သည် အမေရိကန် ပြည်ထောင်စု သမ်္မတ မစ်္စတာ ဘားရက်အိုဘားမား၏ ဖိတ်ကြားချက် အရ မေ ၁၈ ရက်က ၀ါရှင်တန် မြို့သို့ ရောက်ရှိ နေရာမှ မေ ၂၀ ရက် ဒေသ စံတော်ချိန် မွန်းလွဲ ၂ နာရီတွင် ၀ါရှင်တန် မြို့ရှိ အိမ်ဖြူတော်၌ အမေရိကန် သမ္မတ မစ္စတာ ဘားရက် အိုဘားမားနှင့် တွေ့ဆုံ ဆွေးနွေးခဲ့သည်။

ထိုသို့ တွေ့ဆုံစဉ် မစ္စတာ ဘားရက် အိုဘားမားက ပြောကြားရာ၌ ယခုအခါ ဆက်ဆံရေး ပြောင်းလဲလာရ ခြင်းမှာ မြန်မာ နိုင်ငံတွင် သမ္မတ ကြီး၏ ဦးဆောင်မှုဖြင့် ဒီမိုကရေစီ လမ်းကြောင်းပေါ်ကို စီးပွားရေး အရရော၊ နိုင်ငံရေး အရပါ ပြုပြင် ပြောင်းလဲမှုများ ဆောင်ရွက် လာသည့်အတွက် ဖြစ်ပါကြောင်းနှင့် လွှတ်တော်တွင်လည်း မြန်မာနိုင်ငံ အကျိုးအတွက် အားလုံး ပါဝင်နိုင်အောင် ဆောင်ရွက်နေပြီ ဖြစ်ကြောင်း၊ အလွန် ယုံကြည်လောက်သည့် ကြားဖြတ် ရွေးကောက်ပွဲ ကိုလည်း အောင်မြင်စွာ ကျင်းပ ပေးနိုင် ခဲ့ကြောင်း၊ သမ္မတကြီး ဦးသိန်းစိန် အနေဖြင့် မြန်မာ နိုင်ငံတွင် အလွန် ရှည်ကြာလှသည့် တိုင်းရင်းသား ပြဿနာ များကို ဖြေရှင်းရန် ကြိုးပမ်း ဆောင်ရွက်နေပြီး ဒီမိုကရေစီ စံနှုန်းနှင့် ကိုက်ညီသည့် ဥပဒေ များကိုလည်း ရေးဆွဲ ပြဋ္ဌာန်းနေပြီ ဖြစ်ပါကြောင်း၊ ယင်းသို့ ပြုပြင် ပြောင်းလဲမှု အများအပြားကို ဆောင်ရွက် ခဲ့သဖြင့် မိမိတို့က စီးပွားရေး ပိတ်ဆို့မှု အပါအ၀င် ပိတ်ဆို့မှု အားလုံးကို လျှော့ချ ပေးလိုက်ပြီ ဖြစ်ကြောင်း၊ အခြားနိုင်ငံ များကလည်း အလားတူ လျှော့ချ ပေးခဲ့ပြီ ဖြစ်ပါ ကြောင်းဖြင့် ထည့်သွင်း ပြောကြားသွားသည်။

ပြည်ထောင်စု သမ္မတ မြန်မာ နိုင်ငံတော် နိုင်ငံတော် သမ္မတ ဦးသိန်းစိန်က ပြောကြားရာ၌ နှစ်နိုင်ငံ ဆက်ဆံရေး ကောင်းမွန်အောင် မူဝါဒများ ပြောင်းလဲပြီး စတင်ဖော်ဆောင် ပေး ခဲ့သည့် သမ္မတ အိုဘားမားကို ကျေးဇူးအထူး တင်ရှိပါကြောင်း၊ မိမိနှင့် သမ္မတ အိုဘားမားတို့ ယနေ့ တွေ့ဆုံ ဆွေးနွေးရာ၌ မြန်မာ နိုင်ငံတွင် တရား ဥပဒေ စိုးမိုးရေး၊ တပ်မတော်နှင့် ရဲတပ်ဖွဲ့ ၀င်များ အရည်အသွေး မြှင့်တင်ရေး၊ လယ်ယာကဏ္ဍ၊ ပညာရေးနှင့် ကျန်းမာရေး ဆိုင်ရာ ကိစ္စရပ် များကို ဆွေးနွေး ခဲ့ပါကြောင်း၊ မစ္စတာ အိုဘားမားက အမြော်အမြင် ကြီးမားစွာ ဆွေးနွေး ခဲ့သဖြင့် မြန်မာနိုင်ငံ အတွက် အလွန် အကျိုးရှိသည့် ခရီးစဉ် ဖြစ်ပါကြောင်းဖြင့် ပြန်လည် ပြောကြားခဲ့သည်။

သို့ဖြစ်၍ လွန်ခဲ့သော နှစ်ပေါင်း ၅၀ က အမေရိကန် ပြည်ထောင်စုနှင့် မြန်မာနိုင်ငံ တို့၏ ဆက်ဆံရေးသည် နေထိပန်းပမာ ဖြစ်ခဲ့ရာမှ အမြော်အမြင် ကြီးမားသော နိုင်ငံတော် သမ္မတ နှစ်ဦး၏ ကြိုးပမ်းမှုကြောင့် နှစ်နိုင်ငံ ဆက်ဆံရေးသည် ရေထိပန်းသွင် လန်းဆန်းခဲ့ပြီ ဖြစ်ရကား ခေတ်သစ် စနစ်သစ် အတွက် မေ ၂၀ ရက်တွင် စာမျက်နှာသစ် ဖွင့်လှစ် နိုင်ခဲ့ကြပြီ ဖြစ်ပေသည်။