မြန်မာ့ဆက်သွယ်ရေး လုပ်ငန်းနှင့် အကျိုးတူပူးပေါင်းမည့် ကုမ္ပဏီများ" ဆွေးနွေးညှိနှိုင်း www.mgyelatt.blogspot.com

ဧပြီလ ၂၉ ရက်နေ့ ကျင်းပသည့် ဆွေးနွေးညှိနှိုင်းပွဲသည် ဆက်သွယ်ရေးလုပ်ငန်းအား မည်ကဲ့သို့ ပူးပေါင်း ဆောင်ရွက်မည်၊ မည်သည့်လုပ်ငန်းများ ဆက်လက်ဆောင်ရွက်ရန် ဆန္ဒရှိသည်ကို တရားဝင် ခေါ်ယူရှင်းပြခြင်း ဖြစ်ကြောင်း၊ ဆက်သွယ်ရေးဆိုင်ရာ ပြည်သူလူထု၏ လိုအပ်ချက်နှင့် အစိုးရယန္တရားကြား ဖြည့်ဆည်းပေးနိုင်မှု ကွာဟချက်ကို ကျဉ်းနိုင်သမျှ ကျဉ်းအောင် မိမိတို့အပိုင်းက ဆောင်ရွက်ပေးရန် တာဝန်ရှိကြောင်း၊

ဆက်သွယ်ရေးကဏ္ဍနှင့် ပတ်သက်၍ ကောင်းသည်ထက် ကောင်းအောင် လုပ်ပေးရန်အတွက် ငွေကြေး၊ နည်းပညာ၊ လူ့စွမ်းအားအရင်းအမြစ်တို့ လိုအပ်ချက်ရှိသည်မှာ မှန်သော်လည်း ၄င်းတို့အားလုံးအတွက် ဝန်ကြီးဌာန တစ်ခုတည်းက ပြည့်စုံအောင် မဆောင်ရွက်နိုင်ပါကြောင်း၊

ယခုနှစ် ဇွန်လကုန်လောက်တွင် ဆက်သွယ်ရေး လုပ်ငန်းအတွက် နိုင်ငံတကာ အော်ပရေတာ နှစ်ဦးကို အပြီးသတ် ရွေးချယ်ပြီးနောက် ရှစ်လမှ တစ်နှစ်အတွင်း ၄င်းအော်ပရေတာများဘက်က ဆက်သွယ်ရေးကွန်ရက် တပ်ဆင်မှုပြီးစီးလိမ့်မည်ဟု မျှော်လင့်ပါကြောင်း၊ ဆက်သွယ်ရေး လုပ်ငန်းပိုင်း၌ လုံခြုံရေးအရ ကန့်သတ်မှုရှိသည့် လုပ်ငန်းများမှလွဲ၍ ကျန်သည့် လုပ်ငန်းများကို လွတ်လွတ်လပ်လပ် ပူးပေါင်းဆောင်ရွက်နိုင်ပါကြောင်း၊

လုပ်ငန်းဆောင်ရွက်ရာတွင် ဥပဒေနှင့်အညီသာ ဆောင်ရွက်ကြရမည် ဖြစ်သဖြင့် ဆက်သွယ်ရေးကဏ္ဍ တိုးတက်ရေးအတွက် ပူးပေါင်းပါဝင် ညှိနှိုင်းဆောင်ရွက်ပေးကြရန် မေတ္တာရပ်ခံပါကြောင်း၊ ဆက်သွယ်ရေး ဝန်ဆောင်မှုများအား အသုံးပြုရာ၌ ကောင်းသော အရည်အသွေးရှိသည့် ဝန်ဆောင်မှုများကိုသာ ရွေးချယ်အသုံးပြုခွင့်သည် မကြာမီကာလအတွင်း ပြည်သူလက်ဝယ်သို့ ရောက်ရှိတော့မည်ဖြစ်ကြောင်း၊ အားလုံးက ညီညွတ်စွာဖြင့် တိုင်ပင်ဆောင်ရွက်ကြလျှင် မအောင်မြင်စရာအကြောင်း မရှိပါကြောင်း၊

သတ်မှတ်သည့် နည်းလမ်း၊ ပုံစံများဖြင့် အရည်အသွေး ကောင်းအောင် ဆောင်ရွက်ကြမည့် အဖွဲ့အစည်းများကို ကြိုဆိုပါကြောင်းဖြင့် ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန ပြည်ထောင်စုဝန်ကြီး ဦးမြတ်ဟိန်းက ဧပြီလ ၂၉ ရက်နေ့ နံနက် ၁ဝ နာရီတွင် အဆိုပါဝန်ကြီးဌာန အစည်းအဝေးခန်းမ၌ ကျင်းပသည့် မြန်မာ့ဆက်သွယ်ရေး လုပ်ငန်းနှင့် အကျိုးတူ ပူးပေါင်းဆောင်ရွက်မည့် ကုမ္ပဏီများ ညှိနှိုင်းဆွေးနွေးပွဲတွင် ပြောကြားသည်။

ထို့နောက် ကုမ္ပဏီ ၁၈ ခုမှ ကိုယ်စားလှယ်များက အကျိုးတူပူးပေါင်း ဆောင်ရွက်နိုင်မည့် ကိစ္စရပ်များအတွက် မေးမြန်းဆွေးနွေးကြရာ ဒုတိယဝန်ကြီး ဦးသောင်းတင်နှင့် ဌာနအကြီးအကဲများက ပြန်လည် ရှင်းလင်း ဖြေကြားကြသည်။

မြန်မာ့ ဆက်သွယ်ရေး လုပ်ငန်းနှင့် အကျိုးတူ ပူးပေါင်းဆောင်ရွက်နိုင်မည့် လုပ်ငန်းများနှင့် ပတ်သက်၍ ဆက်သွယ်ရေးနှင့် သတင်းအချက်အလက် နည်းပညာဝန်ကြီးဌာန၏ Website (http://www.mcit.gov.mm) ၌ လွှင့်တင်ထားကြောင်း သတင်းရရှိသည်ဟု ၂၀၁၃ ခုနှစ် ဧပြီလ ၃၀ ရက်နေ့ထုတ် ကြေးမုံ သတင်းစာတွင် ဖော်ပြထားပါသည်။

khitlunge .org.mm မှကူးယူဖေါ်ပြသည်